Македонската машка одбојкарска репрезентација со 13 играчи отпатува за Приштина, каде што ќе ги одигра последните два натпревари од годинешното издание на Европската лига.
Селекторот Јошко Миленкоски го скрати списокот и одлучи во Скопје да останат младите Лука Ристоски, Ване Арапов и Јован Милев. Од претходно е познато дека поради повреда надвор од комбинација за целиот циклус е и Александар Љафтов.
Нашите одбојкари веќе се сместени во главниот град на Косово, каде што ќе настапат на третиот и последен турнир во Европската лига 2026.
Македонија првиот натпревар ќе го одигра во петок од 20:00 часот против домаќинот Косово, додека ден подоцна, во истиот термин, ќе се соочи со селекцијата на Израел во последниот меч од овогодинешното издание на натпреварувањето.
