Македонската тениска репрезентација обезбеди промоција во Втората Светска група на Дејвис купот, откако во решавачкиот натпревар за третото место ја совлада Црна Гора со 2-1.
По успешниот настап во групната фаза, каде Македонија ги победи Косово со 3-0 и Грузија со 2-1, а беше поразена од домаќинот Молдавија со 1-2, нашата селекција го освои второто место во групата и доби можност преку дополнителен дуел да се избори за пласман погоре.
Во клучниот натпревар против Црна Гора, првиот поен за Македонија го донесе Калин Ивановски со победата над Срѓан Кнежевиќ. Решавачкиот поен беше освоен во играта на двојки, каде Калин Ивановски и Олег Приходко беа подобри од Петар Јовановиќ и Андреа Кривокапиќ.
Со овој успех, Македонија го заврши настапот во Третата Европска група на третото место, веднаш зад Молдавија и Летонија, и обезбеди враќање во Втората Светска група на Дејвис купот.
Мислам дека имавме многу добар тим оваа година. Лани исто така успеавме да имаме „промоција“, но се вративме во Третата Европска група (по поразот од Кипар) и сега повторно имаме „промоција“ пласман во Втората Светска група – одиме чекор нагоре. Првиот ден немавме среќа (против Молдавија), имавме неколку повреди и како минуваше неделата беше подобро и на крајот се што работевме даде резултат и играчите покажаа што значи како да се игра за државата, изјави селекторот на македонскиот тим Горан Шевченко.
