Охрид и ова лето ќе биде центарот на ракометните случувања во регионот, откако од 18 до 22 август ќе се одржи јубилејното петто издание на меѓународниот турнир „Крсте Андоновски“.
Турнирот, кој во изминатите години прерасна во еден од најпрестижните подготвителни настани во овој дел од Европа, повторно ќе донесе врвни клубови и големи ракометни имиња на брегот на Охридското Езеро.
На годинашното издание ќе настапат осум екипи поделени во две групи. Во групата А ќе играат домаќинот ГРК Охрид, хрватскиот шампион Загреб, египетскиот великан Замалек и српска Војводина. Во групата Б се наоѓаат Вардар 1961, хрватски Нексе, грчки Олимпијакос и словенечки Тримо Требње.
Учесниците зад себе имаат настапи во европските купови и бројни национални титули, што гарантира квалитетни натпревари и силна конкуренција уште во пресрет на новата сезона.
Во текот на петте турнирски дена љубителите на ракометот ќе имаат можност да проследат голем број атрактивни пресметки меѓу екипи кои традиционално се дел од европската ракометна сцена. Дополнителна тежина на турнирот му дава и фактот што за многу клубови ова ќе биде последна и најсилна проверка пред стартот на сезонските предизвици.
Со присуството на еминентни клубови од Македонија, Хрватска, Србија, Грција, Словенија и Египет, Охрид уште еднаш ќе потврди дека заслужено го носи епитетот еден од најважните ракометни центри во регионот. Очекувањата се и ова издание на турнирот „Крсте Андоновски“ да понуди спектакуларни натпревари, исполнети трибини и вистинска празнична атмосфера за сите љубители на спортот.
