КМФ Проект продолжува да го задржува шампионското јадро за новата сезона, откако клубот ја потврди соработката со еден од своите најискусни и најзначајни членови, Мартин Тодоровски.
По историската сезона во која тимот од Јосифово ја освои двојната круна без ниту еден пораз и обезбеди настап во квалификациите за Лигата на шампионите, раководството на клубот јасно покажува дека амбициите остануваат највисоки – одбрана на шампионската титула и Купот на Македонија.
Тодоровски и минатата сезона беше еден од лидерите на тимот, со значајна улога како на теренот, така и надвор од него. Освен што ќе продолжи да го носи дресот на КМФ Проект, тој и понатаму ќе биде дел од стручниот штаб во улога на помошник тренер.
Претходно, клубот ја потврди и соработката со најдобриот стрелец и македонски репрезентативец Марио Благојевски, што е уште еден показател дека Проект сериозно се подготвува за новите предизвици на домашната и европската сцена.
Од КМФ Проект со емотивна порака ја потврдија верноста на Тодоровски.
„Како виното е – со годините сè подобар! Мартин Тодоровски верен на КМФ Проект! И во сезоната 2026/27, еден од најискусните и најважни членови на нашиот тим – Мартин Тодоровски ќе биде дел од КМФ Проект. Додека многумина би помислиле дека годините носат забавување, Маки уште еднаш покажа дека искуството е непроценливо. Зад себе има сезона во која одигра на високо ниво, со настапи и влијание какви што ги паметиме од неговите најдобри денови. Покрај својата улога на теренот, Мартин и понатаму ќе биде важен дел и од стручниот штаб, продолжувајќи како помошник тренер, пренесувајќи го своето знаење, карактер и победнички менталитет на новите генерации. Со нас и на теренот и покрај него. Заедно продолжуваме“, велат од клубот.
Со задржувањето на искусниот Тодоровски, КМФ Проект добива дополнителна сигурност во пресрет на сезоната во која ќе ги брани двата домашни трофеи и ќе ја претставува Македонија во квалификациите за Лигата на шампионите.
