Натпреварот меѓу Каменица Саса и Скопје од последното коло на есенската полусезона во Втората лига ќе добие „трето полувреме“. Ова се случи по инцидентот во 71. минута, кога на теренот влетаа неофицијални лица и ги нападнаа фудбалерите на Скопје.
Голманот на Скопје, Гоце Јовчев, кој доби црвен картон и го напушташе теренот беше нападнат од неофицијални лица. Потоа, физички биле нападнати и останатите фудбалери на гостинската екипа, по што тимот на Скопје се повлече во соблекувалните, а натпреварот беше прекинат при резултат 1:1.
Притоа, на стадионот имало само пет полицајци, а иако било побарано дополнително полициско засилување, по чекањето од 30 минути не пристигнало, што довело до невозможност за продолжување на мечот.
„Натпреварот е прекинат во 71. минута поради влегување на неофицијални лица во теренот за игра каде што беа нападнати играчи на гостинската екипа. Од страна на делегатот беше побарано појачување од МВР и дополнителни полициски службеници поради обезбедување на услови за продолжување на натпреварот. На натпреватот беа присутни само 5 полицајци. По чекање од 30 минути не стигна побараното појачување, а натпреварот не продолжи поради немање безбедносни услови. За инцидентот земени се соодветни изјави од МВР. следуваат дополнителни изјави од судиите,“ се вели во примедбите на делегатот на официјалниот записник од мечот.
Натпреварот се играше без присуство на гледачи, но повеќе од јасно е дека Каменица Саса ќе се соочи со сериозни санкции поради големите организациски пропусти кои доведоа до инцидентот.
