Стадионот „Езеро“ во Крушево сè повеќе се профилира како одлична дестинација за летни подготовки на фудбалските екипи пред стартот на новата сезона 2026/2027, нудејќи квалитетни услови за тренинг и одигрување пријателски натпревари.
Објектот располага со две уредени соблекувални, како и целосно одржуван и валиран терен кој обезбедува рамна и стабилна подлога за работа односно тренинг и натпревари.. Дополнителна предност е тоа што стадионот е опремен со рефлектори, што овозможува тренинзи и натпревари да се одржуваат и во вечерните часови.
Во непосредна близина на стадионот се наоѓаат хотели и вили, што им овозможува на екипите комфорен престој и сместување на само неколку минути од теренот. Тоа дополнително ја зголемува практичноста за организирање подготовки на едно место.
Крушево, како највисок град на Балканот со надморска височина од 1.220 метри, нуди и идеални климатски услови за тренинг во летниот период. Свежиот планински воздух и пријатните температури се голема предност за спортистите.
Градот е одлично поврзан и со останатите делови на државата – од Прилеп е оддалечен околу 32 километри, од Скопје околу 160 километри, а од Охрид околу 120 километри, што го прави лесно достапен и атрактивен за домашни и странски екипи.
Во близина се наоѓа и познатиот споменик „Македониум“, што дополнително му дава туристичка и историска вредност на овој спортски центар.
Со сите овие услови, стадионот „Езеро“ се наметнува како сериозна и модерна опција за летни подготовки и спортски кампови во Македонија.
