Младиот фудбалер на Вардар, Админ Абдула (2008 година), зад себе има извонредна сезона во кадетска конкуренција, сезона во која потврди дека е еден од најперспективните млади играчи во македонскиот фудбал.
Абдула, кој претходно беше дел од Њу Старс и Македонија Ѓорче Петров, оваа сезона со Вардар успеа да ја освои двојната круна, односно шампионската титула во Кадетската Супер лига и Купот на Македонија.
Посебен белег остави и во финалето од Купот на Македонија за кадети против Пелистер. Во возбудлив натпревар кој во регуларниот дел заврши без победник (3:3), токму Абдула се запиша меѓу стрелците за Вардар, а „црвено-црните“ подоцна беа поуспешни во пенал серијата и стигнаа до трофејот.
Неговиот придонес во текот на целата сезона беше огромен. Во Кадетската Супер лига постигна 25 погодоци и сезоната ја заврши како втор најдобар стрелец во шампионатот, додека во Купот на Македонија четири пати ја тресеше противничката мрежа и беше втор стрелец и во ова натпреварување.
Покрај клупските успеси, Абдула е и младински репрезентативец на Македонија, што е дополнителна потврда за неговиот квалитет и потенцијал.
Две освоени титули, голем број постигнати голови, значајна улога во најважните натпревари и статус на еден од најдобрите стрелци во државата во својата генерација – тоа се бројките и фактите кои ја одбележаа сезоната на Админ Абдула.
Со вакви настапи и континуиран напредок, сосема извесно е дека младиот фудбалер на Вардар ќе продолжи да го привлекува вниманието на многу клубови и во иднина ќе биде име за кое сè почесто ќе се зборува на македонската фудбалска сцена.
