Убави вести пристигнуваат за ФК Дојранско Езеро и младите фудбалери од овој регион, откако српскиот фудбалски гигант Црвена Звезда донираше спортска опрема за младите надежи на клубот.
Голема заслуга за реализацијата на оваа иницијатива има поранешниот генерален секретар на Фудбалска федерација на Македонија Никола Костов, кој помогнал да се обезбеди вредната донација за младите фудбалери на Дојранско Езеро.
Во Белград отпатува и тренерот Петар Илиев, кој бил топло пречекан од домаќините. При посетата му била врачена спортската опрема, а воедно имал можност да го разгледа стадионот на Црвена Звезда и да присуствува на тренинг на сениорскиот тим.
Посетата не поминала само во знакот на донацијата. Остварени биле и разговори за идната соработка, при што една од темите била талентираните деца од Дојранскиот регион во иднина да добијат можност да заминат на проба во Црвена Звезда и да го покажат својот потенцијал пред еден од најголемите клубови на Балканот.
Оваа донација претставува значајна поддршка за развојот на младинскиот фудбал во Дојран, а воедно е и дополнителен мотив за младите фудбалери да продолжат со работа и напредок во своите кариери.
