Македонските судии продолжуваат да добиваат значајни меѓународни ангажмани, што претставува уште една потврда за нивниот квалитет, професионализам и довербата која ја уживаат од страна на УЕФА.
На натпреварот меѓу Норвешка и Австрија од квалификациите за Светското првенство во женска конкуренција – Лига А, правдата ќе ја дели македонска судиска четворка предводена од Ивана Пројковска.
Главен судија на средбата ќе биде Пројковска, додека нејзини помошници ќе бидат Елена Соклевска Илиевски и Ангела Домазетовска. Улогата на четврт судија ќе ја извршува Ирена Велевачкоска.
Натпреварот ќе се одигра во вторник, на 9 јуни, со почеток во 18:00 часот на стадионот „Улевал“ во Осло, Норвешка.
Станува збор за важен натпревар во групата од Лига А. По пет одиграни кола, Норвешка се наоѓа на второто место со девет бодови и учинок од три победи и два порази. Австрија е трета со четири бодови, остварени преку една победа, едно реми и три порази. Лидер во групата е Германија со 13 бодови, додека Словенија е четвртопласирана со три бодови.
Новото назначување на македонските арбитри на ваков натпревар од висок ранг е уште една потврда дека македонското судење има свое место на европската сцена. Довербата која УЕФА континуирано им ја укажува на Пројковска, Соклевска Илиевски, Домазетовска и Велевачкоска е признание за нивната работа и квалитет.
