Македонската машка репрезентација во ракомет на плажа доби нов селектор пред претстојните меѓународни предизвици. Ракометната федерација на Македонија му ја довери селекторската функција на Наум Бабачев, кој веќе го одреди тимот за настап во Светската лига на ИХФ.
Нашата селекција во средината на јуни ќе настапи на турнирот во полскиот град Плоцк, каде ќе одигра четири натпревари против силни европски ривали. На списокот на Бабачев се најдоа десет ракометари, а дел од нив веќе имаат искуство во настапите на песок и во претходните репрезентативни акции.
Македонија ќе отпатува за Полска на 12 јуни, додека натпреварите се закажани за 13 и 14 јуни. Противници на нашиот национален тим ќе бидат селекциите на Чешка, Германија и домаќинот Полска.
На списокот на повикани ракометари се: Мартин Ивановски, Леонид Киселоски, Наум Костов, Христијан Крстаноски, Дејан Михајловиќ, Тодор Узунчев, Дамјан Субашевски, Дамјан Тутенкоски, Иван Младенов и Михаил Тотиќ.
Првиот собир на репрезентативците е закажан за 8 јуни од 13:00 часот, по што ќе следуваат завршните подготовки за настапот во Светската лига.
Македонскиот машки национален тим последен пат настапуваше на Европското првенство во 2019 година токму во Полска, а сега ќе се обиде повторно да се наметне на меѓународната сцена и успешно да го започне новиот циклус под водство на Бабачев.
