Фудбалот уште еднаш покажа дека е многу повеќе од игра и резултат. Младиот фудбалер Давид Докмановиќ постигна гол и го посвети на 13-годишниот Аган Асани, кој трагично го загуби животот во тешка сообраќајна несреќа на регионалниот пат Куманово – Скопје.
По погодокот, Докмановиќ покажа маица со порака посветена на Аган и неговото семејство, испраќајќи силна порака за почит, пријателство и заедништво меѓу младите спортисти.
Во разговор за Опен ТВ со колегата Решат Ибраими, младиот фудбалер истакна дека неговиот гест бил исклучиво лична иницијатива и дека пријателството е многу поважно од националната припадност.
„Не е важна националноста, туку важно е другарството. Фудбалот не е само за победа. Пораката ми е дека не е битна националноста на сите деца, дека сите деца треба да се почитуваме. Идејата да го посветам голот беше целосно моја. Ние со Аган игравме многу натпревари еден против друг“, изјави Докмановиќ.
Неговиот потег предизвика бројни позитивни реакции во спортската јавност и уште еднаш потврди дека спортот има моќ да обединува и да испраќа вредни животни пораки.
Во време кога резултатите често се во прв план, Давид Докмановиќ покажа дека најголемите победи се оние човечките.
