Кошаркарите на Вардар се нови шампиони во М16 лигата, откако во возбудливо и неизвесно финале го совладаа Водно Санс со 90:86 и ја освоија титулата државен првак.
Финалниот натпревар понуди одлична кошарка и многу пресврти. Подобар старт имаа младите кошаркари на Водно Санс, кои во првата четвртина постигнаа дури 30 поени и поведоа со осум поени разлика. Вардар успеа делумно да ја намали негативата во втората четвртина, но на полувремето Водно Санс сè уште имаше предност од 53:48.
Во второто полувреме следуваше пресврт. Вардар влезе многу поагресивно и на средината од третата четвртина го израмни резултатот на 63:63. Набргу потоа „вардарци“ поведоа со 66:63, но Водно Санс возврати со серија од седум поени и повторно ја презеде контролата. Сепак, Вардар не се предаде и по три четвртини имаше минимална предност од 72:70.
Драмата го достигна врвот во последниот период. На една минута и 18 секунди пред крајот резултатот беше израмнет (86:86), но Вардар остана посмирен во финишот. Шампионите постигнаа четири поени по ред, не дозволија противникот да се запише во завршницата и стигнаа до голем триумф вреден шампионски пехар.
Најефикасен во победничкиот состав беше Шадиновски со 22 поени, пет скока и три асистенции. Трпчевиќ оствари дабл-дабл учинок од 17 поени и 11 скока, надополнет со четири асистенции. Одлична партија прикажа и Јосиф Џолев со 16 поени и 13 скока, додека Ѓорѓиевски придонесе со 14 поени, пет скока и пет асистенции.
Во редовите на Водно Санс најдобар беше Анѓеловски со 22 поени, седум скока и седум асистенции. Муратовски постигна 21 поен, Веселинов додаде 19 поени и осум скока, а Стаменковски натпреварот го заврши со 15 поени, девет асистенции и седум скока.
По завршувањето на турнирот, признанието за најкорисен играч (МВП) му припадна на Јосиф Џолев од Вардар. Во финалниот натпревар тој запиша 16 поени и 13 скока, од кои осум офанзивни, а додаде и три блокади. Со вкупно 26 индексни поени, Џолев беше најкорисниот играч на големото финале и еден од најзаслужните за шампионската титула на Вардар.
