Голманот Антонио Столевски зад себе има импресивен учинок кога станува збор за бараж натпревари. Младиот чувар на мрежата досега настапи на три баражи и сите три ги заврши победнички, а последниот успех со Шкендија Арачиново сигурно е најголемиот во неговата досегашна кариера.
Првиот бараж триумф Столевски го забележа во сезоната 2023/2024 како голман на Победа. На стадионот во Ѓорче Петров, прилепскиот клуб со 2:1 славеше над тогашниот шампион на Трета лига – Север, Куманово и обезбеди опстанок во второлигашката конкуренција.
Вториот успешен бараж за Столевски следуваше минатата сезона, кога го бранеше голот на Слога Виница. Виничани во баражот против Преспа изборија промоција од Трета лига – Исток во Втората македонска фудбалска лига, а Столевски повторно беше дел од победничката приказна.
Третиот бараж донесе и најголем успех во неговата кариера. На Градскиот стадион во Кавадарци, Шкендија Арачиново го совлада Пелистер и испиша историја со прв пласман во Првата македонска фудбалска лига.
Столевски беше еден од најзаслужните за големиот успех на тимот од Арачиново. Во регуларниот дел му одбрани пенал на искусниот Мирко Ивановски, а потоа во пенал-рулетот блесна со уште три одбранети удари од белата точка, носејќи огромна радост за својот тим и навивачите.
Со тоа, 24-годишниот голман остана со максимален ефект во бараж натпреварите – три настапи и три победи, што е реткост во македонскиот фудбал.
Столевски во својата кариера настапуваше за Шкендија Арачиново, Слога Виница, Брегалница, Победа, Караорман, Кожуф и Велешта, а со последниот успех уште еднаш потврди дека е голман кој знае како се добиваат најважните натпревари.
