Фудбалскиот клуб Огражден е нов шампион на Општинската фудбалска лига – Струмица, откако во директната пресметка за титулата во рамки на последното 14. коло на домашен терен во Ново Село со сигурни 2:0 го совлада најголемиот конкурент Интер Кукла од Куклиш.
Во натпревар кој беше најавуван како вистинско финале на сезоната, тимот на Огражден покажа шампионски карактер и пред својата публика стигна до победа вредна титула. Со ова славје составот од Ново Село ја забележа деветтата сезонска победа и шампионатот го заврши на првото место со 31 освоен бод.
Од друга страна, Интер Кукла го претрпе четвртиот пораз сезонава и со 26 бодови ја заврши сезоната на втората позиција, зад новиот шампион.
На доделувањето на шампионскиот пехар беше присутен и градоначалникот на општина Ново Село, Ѓорѓе Божинов.
Фудбалскиот амбиент во Ново Село беше на високо ниво. Фудбалскиот терен беше исполнет со љубители на фудбалот кои уживаа во одличниот натпревар и неизвесната битка за шампионската круна. Огражден се претстави во одлично светло не само на теренот, туку и во организациска смисла, потврдувајќи дека титулата заврши во вистински раце.
Меѓу присутните на натпреварот беше и македонскиот репрезентативец и член на узбекистанска Согдиана, Љупчо Дориев, кој во присуство на претседателот на ОФС Струмица, Илија Илиев – Рома го проследи дербито за титулата.
Интересно беше и на останатите терени во последното коло од шампионатот. Најефикасниот натпревар се одигра во Пиперово, каде Единство со 5:3 ја совлада Слога од Злеово во меч со дури осум погодоци.
Дрвош ја заврши сезоната со победа, откако на гостински терен во Добрејци славеше против Илинден со 2:3 и го запиша шестото сезонско славје.
Најубедлив триумф во колото оствари Спартмани, која на теренот во Балдовци со убедливи 7:3 беше подобар од последнопласираниот Напредок од Радово.
Со последниот судиски свиреж во Ново Село беше спуштена завесата на уште една интересна сезона во ОФЛ Струмица, а најголемата причина за славје ја има Огражден, кој сосема заслужено ја понесе шампионската титула и го круниса успешниот шампионат со победа во најважниот натпревар од сезоната.
