Тимот на Team Carvalho North Macedonia забележа уште еден успешен настап на интернационалната сцена, откако на престижниот турнир ADCC Macedonia Open 2026, кој денес се одржа во спортскиот центар „Борис Трајковски“ во Скопје, освои вкупно три златни и еден сребрен медал.
На настанот, кој важи за еден од најпрестижните турнири во submission grappling дисциплината и собра натпреварувачи од повеќе европски земји, Team Carvalho Macedonia настапи со седум свои претставници.
За Анабела Поцева, Нико Поцков и Стефан Митев, ова беше прво интернационално искуство на татами, а сите тројца достојно го претставија клубот и покажаа дека пред нив стои светла спортска иднина. Особено успешна беше Поцева, која успеа да стигне до финалето и да го освои сребрениот медал во својата категорија.
Во напредната дивизија настапи и Филип Ѓуров, кој прикажа квалитетни борби и голема борбеност, но овојпат не успеа да стигне до место на победничкиот пиедестал.
Посебно внимание привлече настапот на Изабела Зајков, која немаше конкуренција во својата женска категорија во напредната дивизија. По одлука на организаторот беше префрлена во машката конкуренција до 70 килограми за возраст од 15 до 18 години.
Таа одработи две одлични борби и беше многу блиску до освојување медал, но во мечот за третото место беше поразена од натпреварувач од Бугарија. Сепак, нејзиниот настап остави силен впечаток и беше пример за храброст, самодоверба и натпреварувачки дух.
До највисокото место на пиедесталот стигнаа Надица Ефтимова, Филип Зајков и Давид Зајков, кои ги освоија златните медали во своите категории и уште еднаш го потврдија квалитетот на тимот од Радовиш.
Успешниот настап на ADCC Macedonia Open 2026 претставува уште една потврда за континуираната работа, посветеност и напредок на Team Carvalho Macedonia, а освоените медали се дополнителен мотив за нови предизвици и уште поголеми успеси во иднина.
Инаку, Team Carvalho Радовиш активно работи и врши уписи на нови членови, од понеделник до петок од 17 часот, а членството е бесплатно. Овој спорт веќе во Радовиш и околината предизвика голем интерес, вратите на клубот се отворени за сите заинтересирани, не само од Радовиш туку од цела Македонија.
