Денес ќе бидат одиграни бараж натпреварите за пополнување на последните место во Првата македонска фудбалска лига.
Пелистер и Брера како прволигаши ќе бараат опстанок и ќе ја имаат фаворитската улога, но второлигашите Шкендија Арачиново и Скопје се подготвени за парирање и обезбедување на влез во елитата по потешкиот пат.
На Градскиот стадион во Кавадарци ќе се соочат Пелистер и Шкендија Арачиново. Кај битолчани владее позитивна атмосфера, а тимот во пролетниот дел откако го презеде Марјан Секуловски е во една неверојатна победничка форма, но лошите резултати од есенскиот дел битолчани ги „платија“ со бараж за опстанок.
Тимот на Шкендија Арачиново зад себе има неверојатна форма и за влакно не успеа да стане шампион во Втората лига и да обезбеди директен влез. Екипата на Берат Имери играше и полуфинале од Купот на Македонија, а стадионот во Кавадарци носи среќа за екипата од Арачиново.
Минатата сезона Шкендија Арачиново беше шампион во Трета лига – Север, а потоа на Градскиот стадион во Кавадарци славеше над Осогово и обезбеди место во Втора лига.
Годинава, тимот од Арачиново покажа раст и развој и изгради одличен тим и сега ќе игра бараж, но овој пат за историја и за Прва лига.
На стадионот „Петар Милошевски“ во Битола ќе се соочат Брера и Скопје. Струмичани зад себе имаат сезона во која запишаа неколку катастрофални резултати кои со поинаков тек можеа да им обезбедат и директен опстанок, особено фактот што ремизираа двапати со Македонија ЃП, тие загубени бодови значат и бараж за опстанок, наместо директен опстанок.
Скопје направи одличен тим особено зимава со квалитетни засилувања и беше на чекор од шампионската титула во Втора лига. Со ист број на бодови како и шампионот Брегалница, но со полош меѓусебен дуел Скопје заврши втор и ќе мора преку бараж да бара враќање во елитата по неколку сезони.
Бараж натпреварите се играат денес со почеток од 16:30 часот, а Спортска Мрежа вчера ги објави и судиите кои ќе ја делат правдата, можете да прочитате овде.
