Еурофарм Пелистер 2 продолжува со создавање на млада и перспективна екипа за следната сезона, а ново име во составот на битолскиот тим е талентираниот Андреј Георгиев.
Битолчанецот од наредната сезона ќе го носи дресот на Еурофарм Пелистер 2, каде ќе има можност дополнително да го развива својот потенцијал и да биде важен дел од тимот.
Георгиев важи за еден од најперспективните млади ракометари на својата позиција, а оваа сезона блескаше во настапите како десно крило. Кадетскиот репрезентативец на Македонија доминираше на теренот и речиси на секој натпревар беше меѓу најдобрите поединци, најчесто завршувајќи како најдобар стрелец на својот тим.
Со својата брзина, реализација и напаѓачки квалитети, Георгиев се очекува да донесе дополнителна енергија и ефикасност во играта на Еурофарм Пелистер 2, клуб кој продолжува да инвестира во млади македонски ракометари и идни репрезентативци.
