Македонскиот ракомет се подготвува да испрати еден голем спортски работник, професионалец и човек кој со години беше симбол на пожртвуваност, искуство и верност. Искусниот голман Славјан Паунов на 45-годишна возраст одлучи да стави крај на својата богата и голема ракометна кариера.
Популарниот Цаци, човекот кој со години го бранеше голот на РК Радовиш, утре ќе го го одигра последниот натпревар во својата кариера, кога Радовиш во рамки на Супер лигата ќе ја пречека Струга во СРЦ „25 Мај“ со почеток од 18 часот.
Паунов, кој потекнува од Кочани, во неколку наврати беше дел од РК Радовиш и практично овој град стана негов втор дом. Секогаш кога било најтешко, кога клубот се борел за бодови, за опстанок, за достоинство и за нови успеси, Цаци бил тука. Со своите маестрални интервенции, неверојатни одбрани и огромно искуство знаеше да биде човекот кој носи пресврти, бодови и големи радости за радовишката публика.
Неговите партии секогаш привлекуваа внимание во македонската спортска јавност, а и оваа сезона уште еднаш покажа дека и на 45 години брани како во своите најдобри денови. Паунов докажа дека класата е вечна и дека искуството, посветеноста и љубовта кон спортот немаат граници.
Во текот на својата кариера, покрај за Радовиш, настапуваше и за Борец ФЛ, Овче Поле и Тиквеш, а со екипите од Свети Николе и Кавадарци имаше можност да настапува и на европската сцена во Челинџ Купот.
Славјан Паунов не е само голман. Тој е пример за младите ракометари и голмани, пример за професионализам, дисциплина, посветеност и спортски дух. Човек кој со своето однесување на теренот и надвор од него остави длабока трага во македонскиот ракомет.
Не случајно ужива огромна почит кај радовишката спортска јавност и кај верната навивачка група „Лебари“, која со години беше негов ветер во грб. Утрешниот натпревар против Струга нема да биде само обичен натпревар — тоа ќе биде вечер посветена на еден голем спортски борец.
Салата во Радовиш заслужува да биде исполнета до последно место. Сите љубители на ракометот, сите навивачи и спортски пријатели треба да бидат во СРЦ „25 Мај“ и со голем аплауз да му оддадат почит на човекот кој даде многу за РК Радовиш и за македонскиот ракомет.
Цаци мајсторе, ракометна Македонија е горда што имаше професионалец како тебе. Твоите одбрани, твојата борба, емоција и љубов кон ракометот ќе останат засекогаш запаметени.
Од редакцијата на Спортска Мрежа ти посакуваме среќни, мирни и исполнети пензионерски денови. Благодариме за сè што му даде на македонскиот ракомет!
