Екипи на Младост Богданци и Струга ќе водат директна битка за место во македонската Суперлига за следната сезона.
Тимот од Богданци ја заврши сезоната во Првата лига на второто место и на тој начин обезбеди бараж натпревар за пласман во елитата. Избраниците на Горан Андоновски имаа одлична сезона и сега ќе се обидат повторно да го вратат клубот во најсилното домашно натпреварување, каде последен пат настапуваа во сезоната 2020/2021.
На спротивната страна ќе биде Струга, екипа која заврши на претпоследната позиција во суперлигашкиот плеј-аут и повторно ќе мора преку бараж да го спасува својот статус. Стружани и минатата сезона играа ваков натпревар, кога на неутрален терен во Прилеп успеаја да слават над Мулти Есенс и да обезбедат опстанок.
Според претходно утврдениот распоред, бараж дуелот треба да се одигра на 6 или 7 јуни на неутрален терен, а во наредниот период се очекува да бидат потврдени терминот и градот домаќин.
Младост веќе ги заврши сезонските обврски и ќе има доволно време за подготовка за натпреварот на сезоната, додека Струга до крајот на плеј-аутот ја очекуваат уште дуелите против Радовиш и Еурофарм Пелистер 2.
