Сите екипи кои ќе настапат во баражот за влез во Втората македонска фудбалска лига се познати, а познати се и второлигашите кои ќе се борат за опстанок во мечот кој за нив ќе има карактер на финале.
Според ексклузивни информации на Спортска Мрежа, бараж натпреварите се закажани да се одиграат на 30 мај (сабота), на неутрален терен, дополнително ќе биде утврдено каде.
Според нашите информации второлигашите меѓусебно не може да се погодат во баражот, тоа значи дека второлигашите ќе играат против третолигаши, а само еден меч ќе биде третолигаш со третолигаш.
- Втора МФЛ (11-то пласирана екипа) – Трета МФЛ (1) (ПРВО пласирана екипа)
- Втора МФЛ (10-то пласирана екипа) – Трета МФЛ (2) (ПРВО пласирана екипа)
- Втора МФЛ (9-то пласирана екипа) – Трета МФЛ (3) (ПРВО пласирана екипа)
- Трета МФЛ (4) (ПРВО пласирана екипа) – Трета МФЛ (5) (ПРВО пласирана екипа)
Ова е според одлука од страна на Управниот одбор (УО) на Фудбалската федерација на Македонија (ФФМ).
Дополнително со ждреп ќе се утврдат двојките во баражот.
Екипите на Кожуф, Тетекс и Каменица Саса како второлигаши ќе се борат за опстанок, додека пак Камјани (шампион во Трета лига – Запад), Борец (шампион во Трета лига – Југ), Победа Валандово (шампион во Трета лига – Исток), Еуромилк ГЛ (шампион во Трета лига – Север) и Влазними (шампион во Трета лига – Југозапад) како третолигаши ќе се борат за промоција во Втората македонска фудбалска лига за следната натпреварувачка сезона 2026/2027.
