Екипата на Алкалоид е нов шампион во машката пионерска лига, откако на Ф4-турнирот во Автокоманда во финалниот натпревар го совлада составот на ГРК Охрид со убедливи 28-20.
Избраниците на Дарко Петровски одиграа сигурен натпревар и заслужено стигнаа до трофејот, а најпрецизен во победничкиот состав беше Иван Великов со осум погодоци. Кај охриѓани се истакна Илија Трајчески со седум гола.
Претходно, во полуфиналето, Алкалоид беше подобар од Мулти Есенс со 24-20, додека ГРК Охрид во драматичен меч го елиминира Еурофарм Пелистер 2 со 14-13, благодарение на погодокот на Илија Трајчески по истекот на времето од слободен удар.
Во натпреварот за третото место, Мулти Есенс славеше против Еурофарм Пелистер 2 со 26-22.
За најкорисен играч (МВП) на завршниот турнир беше прогласен Петар Митев од Алкалоид, додека признанието за најдобар голман му припадна на Мартин Пандиловски. Најдобар стрелец на турнирот беше Даниел Христовски од Еурофарм Пелистер 2 со вкупно 15 постигнати гола на двата натпревари.
