Селекторот Јошко Миленкоски и неговиот стручен штаб решија да им овозможат краток одмор на играчите кои беа присутни уште од стартот на подготовките, а од утре на тимот ќе му се приклучат и интернационалците Никола Ѓоргиев, Владо Милев и Филип Маџунков.
По завршувањето на првиот дел од подготовките, Миленкоски го скрати списокот на 17 одбојкари на кои ќе смета за претстојните предизвици. Поголеми изненадувања нема, а главниот товар повторно ќе го понесат искусните репрезентативци. Воедно, можност за докажување добиваат и младите Лука Ристоски, Јован Милев, Митко Спасов и Филип Јованов.
Македонските одбојкари во Скопје ќе тренираат до 27 мај, кога заминуваат за Подгорица каде ќе одиграат два пријателски натпревари против репрезентацијата на Црна Гора, како дел од финалните подготовки пред стартот на Европската лига 2026. Првиот турнир Македонија ќе го одигра од 5 до 7 јуни на домашен терен, во салата „Парк“ во Струмица.
