Натпреварот меѓу ГФК Тиквеш и Пелистер кој ќе се одигра во рамки на 32. коло од Првата македонска фудбалска лига ќе има и силна хуманитарна порака. Кавадаречкиот клуб објави дека целиот приход од продадените билети ќе биде дониран за лекувањето на младиот Божидар.
Мечот ќе се игра во сабота на Градскиот стадион во Кавадарци со почеток од 16 часот, а од клубот упатија повик до сите навивачи, симпатизери и хумани луѓе да се приклучат кон акцијата и преку своето присуство на трибините да помогнат таму каде што е најпотребно.
Божидар досега поминал низ дури 18 операции во битката за подобро здравје, но потребен е уште еден важен медицински зафат. Токму затоа, од Тиквеш сакаат фудбалот повторно да ја покаже својата хумана страна и да обедини што е можно повеќе луѓе.
Кавадарчани веќе го обезбедија опстанокот во прволигашкото друштво, но сега пред клубот и навивачите стои нов предизвик – заеднички да се помогне на Божидар.
„Да покажеме уште еднаш дека кога е најпотребно — сме заедно! Со една купена карта донирате и давате поддршка таму каде што е најпотребна“, порачаа од ГФК Тиквеш.
Во Кавадарци оваа сабота фудбалот ќе има многу поголемо значење од резултатот на теренот – градот ќе игра за Божидар.
