Женскиот фудбалски Куп на Македонија ќе донесе ново возбудливо финале, во кое силите ќе ги одмерат Тиверија Брера и Каменица Саса – две екипи кои веќе имаат значајна историја во ова натпреварување и ќе атакуваат на својот втор трофеј.
За струмичанки ова ќе биде петто Куп финале во клупската историја и нова можност повторно да се искачат на тронот. Единствената Куп титула Тиверија Брера ја освои во сезоната 2017/2018, кога во финалето во Пехчево убедливо со 5:0 го совлада Драгон. Двоен стрелец на тој натпревар беше Александра Терзиски, а меѓу стрелците се запишаа и Теодора Шопов, Рабија Дервиши и Ангела Стојковска.
Тиверија Брера низ годините имаше уште неколку обиди да стигне до трофејот. Во сезоната 2016/2017 загуби од Истатов со 4:2 во финалето во Струмица, потоа во сезоната 2018/2019 беше поразена од Скопје со 3:1, а минатата сезона финалето го загуби од Љуботен со 3:0.
Сепак, во Струмица овојпат владее голем оптимизам. Тимот предводен од Славе Велков игра во одлична форма, а второто место во шампионатот е речиси обезбедено.
Дополнителна самодоверба за струмичанки претставува и убедливата победа од 3:0 против Каменица Саса во рамки на 23. коло од Првата женска фудбалска лига, натпревар на кој Тиверија Брера одигра одлично.
Од другата страна, Каменица Саса ќе го игра своето четврто Куп финале и ќе се обиде да стигне до втората титула во ова натпреварување.
Тимот од Македонска Каменица има една Куп титула, освоена во сезоната 2021/2022, кога во финалето убедливо со 4:0 славеше против Ас Јунајтед.
Во следната сезона, 2022/2023, Саса беше поразена од Љуботен со 4:0, а двете екипи повторно се сретнаа и во финалето од сезоната 2023/2024.
Тогаш Љуботен славеше со минимални 0:1 со голот на Александра Марковска во 93. минута.
Сега, екипата предводена од Зоран Златковски ќе се обиде да стигне до втор Куп трофеј, додека Тиверија Брера со стратегот Славе Велков ќе атакува на второ славје во своето петто финале.
Се е подготвено за нова голема битка за Куп пехарот, во која и двете екипи ќе имаат мотив повеќе да испишат ново поглавје во својата клупска историја.
Финалето се игра денес на стадионот во Ѓорче Петров со почеток од 15 часот.
