Утре во Скопје, женската сениорска репрезентација на Македонија ќе го одржи првиот собир со новиот селектор Милош Гавриловиќ, во пресрет на настапот во Европската лига 2026, која од оваа година има и улога на квалификациски циклус за Европското првенство 2028.
Прозивката е закажана за пладне во хотелот „Континентал“ во Скопје, каде ќе се појават сите одбојкарки од поширокиот список.
Гавриловиќ упати дополнителна покана до примачот на Наковски Волеј, Ивана Милева, која со своите настапи во финалната серија остави силен впечаток, и таа ќе се приклучи на националниот тим во подготовките.
Покрај собирот и работниот состанок, утре не е предвиден тренинг, туку ќе се реализираат мерења и физички тестирања на одбојкарките. Со тренажен процес репрезентацијата започнува во четврток во СЦ „Форца“ во Скопје.
Според планот, подготовките ќе се одвиваат во СЦ „Форца“, а пред стартот на Европската лига ќе биде одигран и пријателски двомеч со Косово на 29 и 30 мај.
Настапот на Македонија во Европската лига 2026 започнува од 5 до 7 јуни, на првиот турнир што ќе се игра во Порто, Португалија.
