Тиквеш во финишот од сезоната влезе во резултатска криза, а турбулентниот период кулминираше со смена на целиот стручен штаб.
Кавадарчани на последните пет натпревари имаат само една победа, остварена на гостувањето во Струга. По еден бод освоија против Башкими и Арсими, додека забележаа убедливи порази од Силекс, Шкендија и Вардар.
Во последните три кола Тиквеш постигна само два погодоци, а прими дури 12.
Сепак, и покрај лошата серија, тимот е далеку од зоната за испаѓање, а предноста во однос на екипите што се на позиции за бараж изнесува пет бода.
Евентуална победа на гостувањето кај Македонија ЃП би значела најава за излез од кризата, додека пораз би ја продлабочил негативната серија.
Оптимизмот кај Тиквеш го зголемува и фактот дека против Македонија ЃП имаат две победи во меѓусебните дуели.
До крајот на сезоната, Тиквеш го очекуваат натпревари со тимови што се борат за опстанок. Следниот викенд во Кавадарци гостува Пелистер, а во последното коло тимот патува во Скопје на дуел со Работнички.
