Во рамки на 31. коло од Првата македонска фудбалска лига, Македонија ЃП на домашен терен ќе го пречека Тиквеш во натпревар кој може многу да влијае на битката за опстанок во елитното друштво.
Тимот предводен од Боби Божиновски влегува мотивирано во овој дуел, со цел да ја продолжи позитивната серија резултати во финишот од сезоната и да ги задржи шансите за спас.
Македонија ЃП во последните два домашни натпревари успеа да стигне до значајни победи. Прво убедливо го совлада Шкупи со 4:0, а потоа славеше и против директниот конкурент Работнички со 2:1.
Сепак, ситуацијата на табелата и понатаму е тешка за составот од Ѓорче Петров. Македонија ЃП има 30 бодови, шест помалку од Пелистер и АП Брера кои се на позициите што водат во баражот за опстанок.
По денешниот натпревар против Тиквеш, „лавовите“ ги очекуваат уште два сериозни предизвици – гостување кај Башкими во Куманово и домашен дуел против Силекс во последното коло.
Дополнителен мотив за гостите е фактот што Тиквеш беше поуспешен во двата меѓусебни натпревари сезонава. Кавадарчани во февруари славеа во Ѓорче Петров со 1:0, а претходно во септември победија со 2:1 на домашен терен.
Натпреварот на стадионот во Ѓорче Петров започнува во 16:00 часот, а за Македонија ЃП трите бода се единствена опција во борбата за опстанок.
