Во тек се пријавувањата за шестото издание на Меморијалниот турнир во мал фудбал „Сашко Гелов – Шулц“, кој и оваа година ќе ги собере љубителите на спортот, дружењето и добрата атмосфера.
Турнирот ќе започне на 10 јуни, додека големото финале е закажано за 19 јуни 2026 година. Натпреварите ќе се играат во формат 4+1, а организаторите најавуваат уште побогато и поатрактивно издание во споредба со претходните години.
Котизацијата за учество изнесува 6.000 денари по екипа, а бројот на учесници е ограничен на само 16 екипи, што значи дека заинтересираните тимови треба навреме да го обезбедат своето место на турнирот.
За најдобрите екипи е предвиден богат награден фонд. Победникот ќе освои 150.000 денари, второпласираниот тим ќе добие 80.000 денари, третото место носи 50.000 денари, додека четвртопласираната екипа ќе биде наградена со 20.000 денари.
Организаторите најавуваат и дополнителна програма со повеќе изненадувања, како и настапи на фолклорни друштва, со цел турнирот повторно да прерасне во вистински спортски и културен настан.
„Пријатели, другари и поддржувачи на ликот и делото на Сашко Гелов Шулц, време е за шестиот меморијален турнир во негова чест. Досега најголеми награди, многу други изненадувања и настапи на фолклорни друштва ќе бидат дел од овој незаборавен настан. Да се собереме повторно, да оддадеме почит и преку спортот и дружењето да го чуваме споменот на нашиот Сашко“, велат организаторите на овој меморијален турнир.
Сите заинтересирани екипи можат да добијат дополнителни информации и да се пријават на телефонскиот број 077 490 684,„“ натпреварот ќе се играат во „Старо училиште“ во Росоман.
Спортска Мрежа и годинава ќе биде медиумски покровител на овој спортски настан во чест на Сашко Гелов – Шулц.
