Бесплатен превоз за навивачите на Слога: Злеово се мобилизира за важниот меч со Дрвош

За двата тима, победата е единствена опција. Слога ќе атакува на својот шести сезонски триумф, кој би ѝ донел 21 бод и можност да се искачи на второто место на табелата, со сериозен напад кон врвот. Од друга страна, Дрвош ќе се обиде да стигне до петтата победа сезонава, со што би дошол до 17 бодови и би се доближил на само еден бод негатива зад Слога.

Тимот од Злеово игра во одлична форма во пролетниот дел од сезоната и јасно покажува шампионски амбиции во ОФЛ Струмица. Токму затоа, клубот реши дополнително да ја мобилизира својата публика и организира бесплатен превоз за сите навивачи кои сакаат да го бодрат тимот на гостувањето во Дрвош.

Организираниот превоз ќе тргне во 14:30 часот од центарот на селото Злеово, а од клубот упатија благодарност до сите кои помогнале во реализацијата на оваа идеја.

Особено впечатливо е што станува збор за натпревар од Четврта лига, а интересот за мечот е огромен. Во време кога ретко се организира превоз за навивачи дури и во Првата и Втората лига, потегот на Слога претставува вистински пример за почит кон публиката и љубов кон локалниот фудбал.

Во Злеово јасно покажуваат дека фудбалот не е само игра, туку и заедништво, емоција и поддршка која се живее секој викенд. Потег за почит, од кој многу поголеми клубови можат да извлечат поука.