Ракометарите на Охрид ги продолжуваат подготовките за новиот предизвик во плеј-офот од Супер Лигата, а во осмото коло на домашен терен ќе го пречекаат составот на Вардар 1961. Натпреварот ќе се одигра во сабота во салата „Билјанини Извори“ со почеток од 18:00 часот, а охриѓани посакуваат позитивен резултат по поразот во финалето на Купот.
Во пресрет на дуелот, своите очекувања ги сподели ракометарот на Охрид, Косуке Јасухира, кој истакна дека тимот е мотивиран да се реваншира за претходниот пораз и дека овој натпревар има големо значење за екипата. Јапонскиот интернационалец потенцира дека атмосферата во тимот е добра и дека сите ќе го дадат максимумот за победа пред домашната публика.
„Одигравме добар натпревар минатиот пат во финалето на Купот, но сепак загубивме. Се надевам на победа во следниот натпревар на домашен терен, овој натпревар е многу важен за нас и ќе дадеме сè од себе.“- изјави Јасухира.
Охрид, сезонава прикажува одлични партии, како на домашен, така и на гостински терен, а дуелот против Вардар носи дополнителен мотив и можност за нов голем резултат пред своите навивачи.
