Женскиот фудбалски клуб ЖФК Истатов уште еднаш покажа дека сериозно работи на развојот на младите фудбалерки и создавање на иднината на македонскиот женски фудбал.
Тимот предводен од искусниот тренер Кирил Изов сезонава игра во одлична форма, а посебно внимание привлекува фактот што шанса во првиот тим добиваат голем број млади и талентирани фудбалерки.
На натпреварот од 23. коло во Првата женска фудбалска лига против Љуботен (0:0), во стартниот состав на Истатов настапија дури шест млади фудбалерки – три родени во 2009 година и три родени во 2008 година.
И покрај младоста на тимот, Истатов прикажува зрели и квалитетни партии во текот на целата сезона. На четири кола пред крајот, клубот е во трка за второто место на табелата, а третата позиција е практично обезбедена.
Дополнителна потврда за квалитетната работа е и податокот дека Истатов во досегашниот тек од сезоната има само два порази, и тоа од новиот шампион Скопје.
Од клубот потенцираат дека се горди на своите млади фудбалерки, кои со голема посветеност, дисциплина и талент покажуваат дека пред нив стои светла спортска иднина.
