Кошаркарките на Бадел 1862 покажаа карактер и огромна борбеност, откако со минимални 71:69 славеа против фаворизираниот состав на Крива Паланка во третиот натпревар од финалната плеј-оф серија.
Со оваа победа, „баделки“ ја одложија шампионската промоција на противникот и изборија уште најмалку еден натпревар во финалето, намалувајќи на 2-1 во серијата.
Избраничките на тренерот Дарко Димитријевиќ одиграа мотивирано и храбро пред своите навивачи, надминувајќи ги сите проблеми со кои се соочуваа во текот на сезоната и финалната серија. Домашниот тим беше решителен до самиот крај, а победата ја обезбеди Ива Чолакоска, која на само 2.1 секунда до крајот реализираше поени за конечни 71:69.
Токму трилингот Фримен, Клири и Чолакоска беше клучен за големото изненадување, комбинирајќи 61 од вкупно 71 поен на Бадел 1862. Интересно е што сите три кошаркарки минаа комплетни 40 минути на теренот.
Фримен покрај поентерскиот учинок запиша и осум скока и осум асистенции, Клири додаде 15 скока, додека Чолакоска мечот го заврши и со девет скока и три асистенции. Значаен придонес имаше и Атанасова со шест поени и шест скока.
Во редовите на Крива Паланка, Робонсон беше најефикасна со 30 поени, иако со голем број шутеви од поле, додека Ниехуес оствари „дабл-дабл“ со 18 поени и 10 скока. Добар настап имаше и Груевска, која постигна 13 поени и четири скока.
Финалната серија сега повторно се сели во Скопје, каде Крива Паланка ќе има нова можност да ја затвори серијата, а Бадел 1862 ќе се обиде да ја продолжи драмата во борбата за шампионската титула.
