Искусниот македонски репрезентативец и интернационалец Владо Милев и неговата Казинбарчика ја затворија сезоната во унгарското првенство со бронзен медал, односно како трет тим во Екстралигата.
Во серијата „подобар во пет“ Казинбарчика со 3-0 во победи го совлада Престиж. Со најголем отпор Милев и неговите соиграчи се соочија на првиот меч, кој го добија со тај-брејк, 3:2. Македонскиот репрезентативец со 17 поени беше лидер на својот тим.
Во следните два натпревари Казинбарчика беше сигурна, со две максимални победи. Милев во вториот дуел постигна 12 поени, додека во третиот го одигра само првиот сет, со скромен учинок од два поени додека во останатиот дел од натпреварот шанса добија играчите со помала минутажа.
Милев повторно успешно завршува уште едно интернационално поглавје во кариерата, а следно кон што ќе се насочи се репрезентативните обврски.
Во меѓувреме уште тројца македонски репрезентативци се во „трка“ за медали, но тие се борат за злато и за шампионските титули во првенствата во кои настапуваат.
Александар Љафтов и Елоре играат за титулата во Унгарија против Фино Капошвар, а во моментов е 1-1 во победи во серијата „подобар во пет“.
Никола Ѓоргиев и Карловарско во чешкото првенство вечерва го играат петтиот натпревар во финалната серија против Прага. Долгата серија е 2-2 во победи, а коректорот и неговиот тим играат денеска за титула.
Средниот блокер Филип Савовски и Панатинаикос во Грција, пак, синоќа славеа со 3:2 (25:22, 21:25, 22:25, 25:18, 16:14) против ПАОК по скоро два ипол часа игра и поведоа со 2-1 во финалето на плејофот.
