Екипата на Маџари продолжува да биде најпријатното изненадување во сезоната, откако славеше на гостувањето кај ТФТ со 84:82 по продолжение, во првиот натпревар од полуфиналната плеј-оф серија.
Дуелот одигран во салата „Лазар Лечиќ“ донесе вистинска драма и неизвесност до самиот крај, а гостите од Маџари стигнаа до првата – и историска – победа во плеј-оф натпреварите, со што поведоа со 1-0 во серијата.
Маџари имаше подобар старт и уште во првото полувреме ја презеде контролата, стекнувајќи се со предност од 19:16 по првата четвртина, а во втората делница и со највисоки +9 (31:22 и 33:24). Сепак, ТФТ успеа да се врати преку расположениот Ташовски и Говенс, намалувајќи ја негативата пред паузата.
Во второто полувреме, домаќините направија целосен пресврт и поведоа со 50:42, но Маџари не се откажа и постепено се врати во игра, намалувајќи на 52:56 пред последната четвртина.
Финишот донесе нова неизвесност. Маџари отвори со серија од 7-0 и повторно го презеде водството, а на нешто повеќе од три минути до крајот имаше и убедливи 73:62. Но тогаш на сцена стапи Говенс, кој со три тројки по ред го врати ТФТ во игра и израмни на 73:73, носејќи го натпреварот во продолжение.
Во дополнителните пет минути се играше кош за кош, со постојани промени на водството. Во драматичната завршница, Дејвис реализираше едно слободно фрлање за 82:81, но следуваше брз одговор преку Хот за 83:82. Клучниот момент го донесе Димчевски, кој реализираше едно слободно фрлање за 84:82, по што ТФТ направи уште една грешка и Маџари стигна до голема победа.
Кај победничкиот тим се истакна Грин со 19 поени, девет асистенции и три скока, Луис додаде 18 поени и седум скока, Армстронг постигна 17, а Савиќ 12 поени. Хот имаше значаен придонес со осум поени и 13 скока, додека Димчевски мечот го заврши со девет поени и десет скока.
Во редовите на ТФТ, Говенс беше најефикасен со 28 поени, додека Ташовски додаде 19. Гордон запиша осум поени и 15 скока, а Дејвис седум поени и десет скока.
Следниот натпревар од серијата ќе се одигра на 12 мај, кога Маџари ќе ја има улогата на домаќин.
Во второто полуфинале, МЗТ Скопје Аеродром и Пелистер ќе ја отворат серијата на 6 мај (среда) од 19 часот во СЦ „Јане Сандански“.
