Вардар продолжува со сигурни чекори кон врвот во Првата македонска лига, откако во рамките на 28. коло убедливо го совлада Шкупи со високи 7-0. „Црвено-црните“ од самиот старт ја наметнаа својата игра и не оставија простор за изненадување.
Уште во првите минути беше јасно дека иницијативата е на страната на вардарци, кои создадоа неколку изгледни шанси, а првиот гол пристигна преку Горан Закариќ. Иако ситуацијата беше проверувана со ВАР, погодокот беше признат и ја отвори серијата голови.
До паузата Вардар ја зголеми предноста преку Давид Бабунски и автоголот на Ендрит Рустеми, со што на полувреме се замина со убедливи 3-0.
Во вториот дел, доминацијата продолжи. Тодоровски погоди за 4-0, а потоа следуваа голови на Цветковиќ и Спахиу за дополнително зголемување на разликата.
Конечниот резултат го постави Азер Омерагиќ во самиот финиш за убедливи 7-0.
Со оваа победа Вардар ја задржува лидерската позиција и ја продолжува трката за титулата, додека Шкупи немаше одговор на разиграниот противник.
