Силекс се наоѓа во резултатска криза, откако на последните четири натпревари во Првата македонска фудбалска лига забележа две ремија и два порази. Тимот сè уште нема победа на домашен терен во пролетниот дел од сезоната, а денеска во Кратово му гостува последнопласираниот тим на Шкупи.
Ова е добра можност за Силекс да се врати на победничките патеки и да започне серија на позитивни резултати со кои дополнително ќе ја зацврсти четвртата позиција на табелата. Сепак, и покрај фаворитската улога, од кратовскиот табор потенцираат дека бодовите мора да се заслужат на терен и дека противникот не смее да се потцени.
Со оглед на формата и состојбата на противникот, сè освен победа на Силекс би претставувало големо изненадување.
„Очекувањата се само три бода на домашен терен против екипата на Шкупи. Овој меч доаѓа во вистински момент за нас. Сега имаме свежина после паузата поради репрезентациите, и се надевам дека ќе ги освоиме бодовите и дека потоа ќе почнеме една долга победничка серија. Нема никого да потцениме, треба да излеземе на терен, да ги одработиме задачите кои ќе ни бидат поставени и да дојдеме до триумф“, изјави дефанзивецот на Силекс, Ѓорѓе Џеков.
