Арсими го очекува уште една исклучително тешка пресметка, овој пат против актуелниот лидер Вардар, во натпревар од 24. коло на првата лига. Гостиварскиот состав се надева дека ќе ја продолжи добрата форма и дека може да стигне до позитивен резултат, иако задачата е многу комплексна.
Еден од најискусните фудбалери на тимот, Башким Велија, верува дека Арсими се движи во вистинска насока и покрај минималниот пораз од Шкендија во претходното коло. Според него, екипата веќе покажува значителен напредок:
“И покрај поразот, формата оди во нагорна линија и против Вардар одиме да постигнеме позитивен резултат. И покрај минималниот пораз од Шкендија, сметам дека покажавме многу подобра игра во споредба со претходните натпревари. Полека излегуваме од кризата. Можеби резултатите сè уште не се како што посакуваме, но играта ни е подобра и тоа е многу позитивен знак”, истакнува Велија.
Тој дополнува дека тимот е на добар пат конечно да ги капитализира подобрите партии:
“Убеден сум дека многу скоро ќе почнеме да бележиме позитивни резултати и да се вратиме таму каде што мислиме дека ни е местото.”
Во пресрет на дуелот со Вардар, Велија потенцира дека мотивацијата во тимот е на највисоко ниво:
“Против Вардар ќе влеземе максимално мотивирани. Не очекува исклучително важен натпревар и ќе дадеме се од себе за добар резултат. Целите за сезоната остануваат исти и решени сме да ги постигнеме.”
Арсими верува дека може да го изненади лидерот и да се врати со позитивен резултат, што би било голем поттик за продолжението од сезоната. натпреварот. Натпреварот ке се одигра денес со почеток од 14:30 часот на градскиот стадион во Гостивар.
