Во петок на Градскиот стадион во Валандово ќе се одигра пријателски натпревар меѓу третолигашот Победа и второлигашот Осогово од Кочани. Средбата е закажана со почеток од 15:00 часот.
За тимот од Кочани ова ќе биде последна контрола пред стартот на пролетната полусезона во Втората лига. Тренерот Крсте Крстев ќе ја има финалната можност да ја провери формата на своите избраници и да добие појасна слика за подготвеноста на екипата пред продолжението од шампионатот, кое започнува на 21 февруари. Осогово пролетниот дел го отвора на домашен терен против Каменица Саса.
Од друга страна, Победа од Валандово има повеќе време за темпирање на формата, со оглед дека пролетниот дел во Третата лига Исток започнува на 8 март. До тогаш, третолигашот ќе одигра уште неколку контролни натпревари со цел максимално подготвен да влезе во продолжението од сезоната, во кое ќе се обиде да ја задржи лидерската позиција и да избори бараж за пласман во Втората лига.
