Машката А Репрезентацијата на Македонија утре ќе ги дознае своите противници за новото издание на Лигата на нации, во кое нашата селекција за првпат во историјата ќе настапува во Лига Б.
Овие натпревари ќе претставуваат голем предизвик за актуелната генерација, но и добра можност селекторот Гоце Седлоски дополнително да го подготви тимот за квалификациите за Европското првенство кои започнуваат во 2027 година.
„Репрезентациите од првиот и вториот шешир објективно се фаворити поради нивниот рејтинг, искуство и континуитет на големите натпреварувања. Сепак, тоа не значи дека однапред се знае исходот. Нашата цел е да бидеме конкурентни на секој натпревар, да го наметнеме нашиот стил и да покажеме дека Македонија со право е дел од Лига Б.
Ќе ги почитуваме сите противници, но најмногу ќе веруваме во себе. Ако бидеме организирани и фокусирани од првата до последната минута, можеме да бидеме незгоден противник за секого. Овој циклус го гледаме како нов чекор напред и можност дополнително да го потврдиме нашиот квалитет.
Верувам дека репрезентацијата ќе напредува низ натпреварите во Лига Б и дека имаме добра основа за позитивни резултати“, изјави Седлоски во пресрет на ждрепката.
Ждрепката ќе се одржи утре во Брисел со почеток во 18:00 часот. Македонија се наоѓа во четвртиот шешир заедно со Шведска, Северна Ирска и Косово.
Носители се селекциите на Шкотска, Унгарија, Полска и Израел. Во вториот шешир се Швајцарија, Босна и Херцеговина, Австрија и Украина, додека во третиот се Словенија, Грузија, Република Ирска и Романија.
