Името на Меланија Грозданова (17) повторно е во центарот на европското фудбалско внимание. По четиридневниот собир на А-репрезентацијата на Македонија, „Golden Girl“ MG7 веќе денес се наоѓа во Белград со својот клуб Љуботен, каде ќе одигра пријателски натпревар против Црвена Звезда – еден од најголемите клубови во регионот.
Главната вест, сепак, доаѓа надвор од теренот. Според ексклузивни информации на Спортска Мрежа блиски до скаутските кругови, натпреварот во Белград ќе го следат емисари на Атлетико Мадрид, кои специјално допатуваа за во живо да го проследат настапот на најталентираната фудбалерка што Македонија некогаш ја имала. Шпанскиот гигант сериозно го следи развојот на Меланија Грозданова и сака одблизу да ја види против силен противник.
Ова е уште една потврда дека Меланија денес е под радарот на речиси целата фудбалска Европа. По интересот од неколку водечки клубови од Италија, во трката сега се вклучува и Шпанија – земја која во последните години го диктира темпото во женскиот фудбал. Скаутите на мадридски Атлетико пристигнуваат во Белград со јасна цел: од прва рака да ја проценат фудбалерката за која со месеци се зборува како за идна ѕвезда на европската сцена.
Дуелот против Црвена Звезда ќе има дополнителна тежина и поради фактот што станува збор за фудбалерка од која се очекува многу и во новиот, подмладен состав на А-репрезентацијата на Македонија. Стручниот штаб, но и јавноста, ја гледаат Меланија како клучна фигура околу која треба да се гради играта и амбициите во претстојните квалификации за Светското првенство, кои започнуваат на почетокот на март.
Интересот на Атлетико Мадрид не е случаен. Грозданова зад себе има силен континуитет на настапи, како на клупско, така и на репрезентативно ниво, и тоа и покрај нејзините многу млади години. Токму поради тоа, секој нејзин настап во овој период е под будното око на европските скаути.
Вреди да се истакне и дека менаџерот на Меланија доаѓа од Белград, па претставниците на шпанскиот клуб ќе престојуваат во негово друштво за време на овој натпревар, што дополнително ја потврдува сериозноста и нивото на интерес што моментално владее околу македонската „Golden Girl“.
Белград денес е многу повеќе од место на еден пријателски натпревар. Тој ќе биде сцена на која Меланија Грозданова уште еднаш ќе потврди дека е фудбалерка чие време допрва доаѓа и дека околу нејзиното име веќе сега се вкрстуваат погледите на најголемите клубови во Европа.
