Екипата на Арсими продолжува со кадровско засилување пред пролетниот дел од сезоната, откако во своите редови го доведе шпанскиот фудбалер Маркел Гони Ибаргурен.
Станува збор за 24-годишен играч од средниот ред, кој во младинските категории бил дел од школата на Реал Сосиедад и настапувал за Ц-тимот на баскискиот клуб. Ибаргурен зад себе има солидно интернационално искуство, а последните неколку сезони ги мина во кипарскиот фудбал, каде ги носеше дресовите на АПОП Полис и Ахиронас.
Кариерата во Шпанија, покрај Реал Сосиедад, ја градеше и во клубовите Раио Кантабрја, Аренас Клуб и Замора, што дополнително говори за неговото искуство на различни нивоа во шпанскиот фудбал.
Ибаргурен во Арсими пристигнува како слободен играч и со клубот од Чегране потпиша договор на една и пол година. Од таборот на „жолто-црните“ изразија задоволство од новото засилување, посакувајќи му добро здравје и многу успех во дресот на Арсими.
Со ангажманот на шпанскиот играч, Арсими јасно става до знаење дека амбициозно влегува во продолжението од сезоната и сака дополнително да го зацврсти средниот ред во борбата за остварување на зацртаните цели.
