В недела ќе се одиграат натпреварите од последното 9. коло со што ќе заврши есенската полусезона во Трета лига – Исток.
Пијанечко-малешевско дерби ќе се игра во Делчево, каде силите ќе ги одмерат Брегалница Делчево и Малеш од Берово, а на кое дерби на Градскиот стадион во Делчево се очекува околу 1.000 навивачи и љубители, со тоа што од Берово се очекува да пристигнат околу 200 до 250 навивачи, а кој како што велат од управата на клубот од Делчево ќе бидат топло пречекани.
Како што веќе објави Спортска Мрежа, за што потврдија од Трета лига – Исток, овој натпревар е прогласен за натпревар од висок ризик, но денес од управата на Брегалница Делчево демантираат и во разговор за Спортска Мрежа истакнаа дека ќе навиваат братски со нивните соседи од Берово.
„Нема причини зошто овој натпревар да биде натпревар од висок ризик, ние со ФК Малеш имаме одлична соработка, минатата сезона им дадовме пет играчи на позајмица, на секој меѓусебен натпревар навиваме заедно, навиваме братски, навивачи на двете екипи и сите љубители на фудбалот седиме заедно на трибината и заедно навиваме. Гостинските навивачи ќе бидат топло пречекани. Очекуваме многу публика од пијанечко-малешевскиот регион. Имаме одлична соработка со сите клубови во нашиот регион. Ќе навиваме корекно, нека победи подобриот“, велат за Спортска Мрежа од управата на Брегалница Делчево.
И од гостинскиот тим од Берово истакнаа дека ќе се навива корекно и братски.
„Со сигурност Ви доловуваме дека дербито на истокот ќе биде токму тој натпревар! Натпреварите помеѓу овие два клуба привлекувале огромен број на фудбалски обожаватели, ние мотивирани со добра резултатска серија на победи, сакаме да истакнеме дека одиме мотивирани на тешкото гостување и се надеваме на позитивен резултатски исход. Но секако ја бараме вашата поддршка од трибините! Како и до сега не сме оставени сами, секогаш ни давате мотив за подобра игра драга публико, затоа недела ни сте потребни од кога и да било, за да можеме заедно и на гостински терен да славиме и заедно да се радуваме. Со екипита на Брегалница од секогаш сме негувале одлични пријателски односи , затоа треба дербито во неделата да биде со фер и коректно навивање“, се вели во соопштението на Малеш.
Натпреварот се игра в недела од 13 часот, а ова ќе биде соочување на второпласираната Брегалница со 14 бодови и Малеш кој е седми со 10 бодови.
