Денеска во Нион беше одржана ждребката за новото издание на Уефа Лигата на нации во женска категорија, со што македонската репрезентација ги дозна противниците.
Македонија е во групата шест од Ц сегментот, а ќе се натпреваруваме против селекциите на Косово и Летонија. Селекторот Александар Андов рече дека сме добиле група по мерка, не го криеше задоволството, додава дека е вистинско време да направиме чекор напред и да го осовиме толку посакуваното прво место во групата.
„Морам да признаам дека добивме група по мерка. Се работи за противници кои ни се добро познати и со кои бевме во група во изминатите два циклуса. Мислам дека сега е вистинското време да го направиме тој чекор напред и да успееме да го освоиме толку посакуваното прво место во групата. Верувам дека можеме , умееме и имаме квалитет за такво нешто. Во следниот период се надевам дека ќе ги завршиме и преговорите околу пријателските натпревари што треба да ги одиграме и кои ќе претставуваат одлучна подготовка за предизвиците што ќе не очекуваат во новиот циклус од Лигата на нации“, рече селекторот Андов.
Во следниот период Македонија треба да одигра пријателски натпревари преку кои ќе ја тестира и темпира формата за предизвиците од новото, второ издание на Лигата на нации во женска конкуренција.
