Фудбалерите на Вардар продолжуваат со подготовките за продолжението на сезоната во Првата македонска фудбалска лига, откако по завршувањето на подготовките во Анталија се вратија во тренинг центарот во Хиподром – Скопје.
На првиот тренинг по враќањето во Македонија се приклучија и последните засилувања договорени во зимскиот преоден рок. Нови членови на „црвено-црниот“ состав се Бобан Николов, Дарко Велковски и Стефан Цветковиќ, кои веќе се ставија на располагање на стручниот штаб.
Аргентинецот Лукас Пулеио беше дел од подготовките во Анталија, додека Торес Јоаким допрва треба да се вклучи во тренажниот процес, откако неодамна пристигна во базата на клубот и се очекува наскоро да конкурира и за настапи.
Во рамки на подготовките, Вардар во сабота, на 7 февруари, ќе одигра пријателски натпревар против ГФК Осогово. Средбата ќе се одигра на Градскиот стадион „Никола Мантов“ во Кочани, со почеток од 14 часот.
Продолжението на првенството за вардарци следува во среда, на 11 февруари, кога од 13 часот, на фудбалскиот терен „Петар Милошевски“ во Скопје, ќе се соочат со екипата на Арсими во рамките на 17. коло од Првата македонска фудбалска лига.
