ЖРК Вардар и во овој зимски преоден рок јасно ја следи стратегијата за градење тим со млади македонски репрезентативки. „Црвено-црните“ официјално го потврдија ангажманот на уште една перспективна ракометарка, со што ова е петтото засилување кое настапува за националните селекции на Македонија.
Нов член на Вардар е талентираното десно крило Мина Ѓурческа, која доаѓа од редовите на Металург Автокоманда. По Таида Беровиќ, Евгенија Смиљковска и сестрите Ања и Мила Лашкоски, уште една ракометарка од Автокоманда ја продолжува кариерата во скопскиот гигант.
Ѓурческа е пионерска репрезентативка на Македонија и во продолжението од сезоната ќе биде дел и од сениорскиот состав на Вардар, но и од младинските категории на клубот. Станува збор за 15-годишна ракометарка, родена 2010 година, која претходно настапуваше и за екипата на Скопје 2020, пред да се пресели во Автокоманда.
Дополнителна потврда за нејзиниот потенцијал е и повикот за Медитеранското првенство, кое годинава ќе се одржи во Приштина, Косово, каде Ѓурческа ќе ја претставува Македонија.
Со ова засилување, Вардар уште еднаш покажува дека сериозно инвестира во иднината и во развојот на младите македонски ракометарки, со јасна визија за стабилен и конкурентен тим во наредните сезони.
