Вечерва во салата „Јордан Мијалков“ се одигра дербито меѓу актуелниот освојувач на Купот, Штип УГД, и актуелниот шампион Струмица, кое заврши со убедлива победа на штипјани од 3-0 во сетови.
Избраниците на Кристиан Ристоски доминираа во текот на целиот натпревар, јасно ставајќи до знаење дека екипата од градот под Исарот сериозно атакува на двојната круна оваа сезона.
Првиот сет заврши со резултат 25:19, а идентичен исход имаше и во вториот сет, по што шампионот веќе беше во подредена позиција и немаше сила за резултатски пресврт.
Во третиот сет, Штип УГД ја заокружи одличната партија со уште поубедлива игра, славејќи со 25:16 и потврдувајќи ја големата победа.
Штип УГД, кој сезонава за првпат настапи и на европската сцена, покрај одбраната на Куп-титулата, јасно ја покажува амбицијата и за освојување на првата шампионска титула во клупската историја. Со ваквите настапи, штипјани се на добар пат да испишат нова значајна страница и да ја прекинат долгогодишната доминација на струмичани.
