Радовишанецот Диме Димов отвора ново интернационално поглавје во својата кариера, откако постигна договор со албанскиот прволигаш Билис. Искусниот македонски стопер во новата средина доаѓа како слободен фудбалер, по прекинот на соработката со индонезискиот Персебаја на почетокот на 2026 година.
31-годишниот дефанзивец зад себе има богато искуство и настапи во повеќе земји. По Македонија и Бугарија, каде го носеше дресот на Локомотив Софија, Димов последната сезона ја мина во индонезискиот фудбал. Во Персебаја беше стандарден член и во сите конкуренции запиша вкупно 29 официјални настапи, оставајќи впечаток со стабилни и сигурни партии во одбраната.
Иако имаше понуди да продолжи во Азија, како и интерес од клубови од Првата македонска фудбалска лига, Димов се реши за трансфер во Албанија и нов предизвик со Билис. Во клубовите во кои настапувал важел за стандарден првотимец, што е уште една потврда за неговиот квалитет и професионален однос.
Кариерата ја започна во младинските категории на радовишка Плачковица, а беше дел и од Металург, Тиверија, Кожуф, Гостивар и Хоризонт Турново, пред да ја изгради најдолгата и најстабилна фаза во дресот на Академија Пандев. Во струмичкиот клуб помина седум години, ja носеше капитенската трака и остави длабока трага во домашниот фудбал. Со струмичани во сезоната 2018/2019 го освои Купот на Македонија.
Со искуството од елитните лиги и настапите надвор од државата, радовишанецот Диме Димов пристигнува во Билис како значајно засилување, од кое се очекува да донесе цврстина и лидерство во одбрана на албанскиот тим.
