Женскиот ракометен клуб Вардар продолжува со интензивните подготовки за продолжението од сезоната и паралелно го заокружува ростерот со квалитетни млади ракометарки. „Црвено-црните“ зад себе веќе имаат успешно учество на меѓународниот турнир „Атлетик и пријателите“, каде стигнаа до златниот пехар, а дел од тој успех беа и новите засилувања кои постепено се интегрираат во тимот.
Од денес, Вардар и официјално доби уште едно репрезентативно име во своите редови. Нов член на скопскиот клуб е десниот бек Евгенија Смиљковска, која во Вардар доаѓа од екипата на Металург Автокоманда.
Смиљковска е млад, но веќе докажан ракометен талент, кој зад себе има значајни индивидуални и репрезентативни успеси. Минатата година беше прогласена за МВП на пионерскиот фајнал-фор, што е уште една потврда за нејзиниот потенцијал и квалитет. Таа настапуваше за кадетската репрезентација на Македонија на Европското првенство во Црна Гора, беше дел од националниот тим на ЕМОФ во Скопје, а се најде и во изборот за настап на Медитеранското првенство во Приштина.
Со трансферот на Смиљковска, Вардар дополнително ја засилува бековската линија и продолжува со стратегијата за градење тим со млади, перспективни и репрезентативни ракометарки. По претходно промовираните Таида Беровиќ, како и сестрите Ања и Мила Лашкоски, доаѓањето на Смиљковска е уште еден јасен сигнал за амбициите на „црвено-црните“ во продолжението од сезоната.
