Прволигашот Пелистер успешно ги заврши двонеделните подготовки во Белек, Турција, каде што битолскиот прволигаш ја реализираше втората фаза од припремниот период.
Стручниот штаб, предводен од Милан Стојановски, во целост ја исполни планираната програма, а експедицијата во саботата се врати во Битола.
Во текот на подготовките, шанса доби целиот ростер на „зелено-белите“. Беа одиграни четири контролни натпревари, а преку интензивните тренинг-сесии стручниот штаб доби појасна слика за тимот со кој Пелистер ќе настапува во пролетниот дел од Првата фудбалска лига.
Своите први минути во дресот на Пелистер ги запишаа и новајлиите, по што се наѕира и изгледот на екипата за продолжението на сезоната. По враќањето во Битола, фудбалерите добија слободен викенд, по што ќе следи последната фаза од подготовките, во која се планирани и уште два контролни натпревари.
Првиот официјален предизвик за Пелистер во пролетниот дел од шампионатот е натпреварот против Работнички, закажан за 11 февруари во Битола.
