Вчера се одржа 71. издание на манифестацијата „Спортисти на годината за 2025“, на кое македонскиот спорт беше собран на едно место, а беа доделени и признанија за најуспешните спортисти, тренери и федерации.
На свечената церемонија, за најуспешен спортист за 2025 година заслужено беше избран боксерот Ален Рустемовски, освојувач на сребрен медал од Европското првенство до 23 години во Ереван (Ерменија).
Признанието за најдобра спортистка за 2025 и припадна на Катерина Попева (бодибилдинг и фитнес), која во Санта Сузана (Шпанија) се закити со титулата светска шампионка на Светското првенство во бодибилдинг и фитнес.
Министерот за спорт Борко Ристовски упати честитки до сите добитници, но и до оние кои беа номинирани за наградите, испраќајќи силна порака да продолжат да се борат, никогаш да не се откажуваат и секогаш да веруваат во себе, бидејќи токму тоа е единствениот пат до успехот.
Добитници на наградите за 2025 се:
- Спортист на годината – Ален Рустемовски (бокс)
- Спортистка на годината – Катерина Попева (боди билдинг и фитнес)
- Најуспешен млад спортист – Адријан Рустемовски (бокс)
- Најуспешна млада спортистка – Даниела Алексовка ( бразилска џиу џица)
- Најуспешен женски национален тим – Ракометна репрезентација на Македонија (сениорки)
- Најуспешен машки национален тим – Одбојкарска репрезентација на Македонија (сениори)
- Најуспешен тренер/селектор – Могамед Ибрагимов (борење)
- Најуспешна национална спортска федерација – Џудо федерација на Македонија
- Најуспешен спортист со инвалидитет – Андреј Стојановски (пливање)
- Најуспешна спортска екипа од Универзитетите – Машки тим во мал фудбал на Универзитетот „Св. Кирил и Методиј“ – Скопје
- Најуспешен училишен спортски клуб од средните училишта – СУГС „ Никола Карев“- Скопје
- Најуспешен училишен спортски клуб од основите училишта – ООУ „ Никола Карев“ – Кочани
- Специјално признание – Петар Цеков (пливање)
